កាលពីថ្ងៃ១៣-១៤ ខែមិថុនា ឆ្នាំ២០១៦ ក្រុមប្រឹក្សាអភិវឌ្ឍន៍កម្ពុជា និងក្រសួងពាណិជ្ជកម្ម ក្រោមកម្មវិធីអភិក្រមគ្របដណ្តប់ទូទាំងវិស័យពាណិជ្ជកម្ម បានសហការរៀបចំសិក្ខាសាលាស្តីពី “ការ​ជំរុញ និងកិច្ច​សម្រួលការ​វិនិយោគ” នៅទីរួមខេត្តបាត់ដំបង ក្រោមអធិបតីភាពឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជា​អគ្គលេខាធិការក្រុមប្រឹក្សាអភិវឌ្ឍន៍កម្ពុជា។

គោលបំណងរបស់សិក្ខាសាលា គឺ​ដើម្បីចែករំលែកចំណេះដឹង និង​ធ្វើបច្ចុប្បន្នភាពការងារពាក់ព័ន្ធនឹងការ​វិនិយោគឯកជន​ និង​ការ​អនុវត្ត​គោលនយោបាយអភិវឌ្ឍន៍ឧស្សាហកម្មកម្ពុជា ឆ្នាំ២០១៥-២០២៥ ជូនមន្ត្រីដែលមានសមត្ថកិច្ច​ពាក់ព័ន្ធហើយដែលបាននិងកំពុងបម្រើការនៅអនុគណៈកម្មាធិការិនិយោគខេត្ត​ និង​តំណាងផ្នែកឯកជនផងដែរ។​ សិក្ខាសាលាដែល​រៀបចំទ្បើងនេះគឺមានការ​ចូលរួមពីមន្ត្រីរាជការជា សមាជិកអនុគណៈកម្មាធិការវិនិយោគ និង​សភាពាណិជ្ជកម្ម​ ខេត្តបាត់ដំបង ខេត្តប៉ៃលិន ខេត្តបន្ទាយមានជ័យ ខេត្តពោធិសាត់ និងខេត្តកំពង់ឆ្នាំង ដែល​មានអ្នកចូលរួមសរុបទាំង​អស់ប្រមាណ៨០នាក់។

បន្ទាប់ពីឯកឧត្តម ជា វុទ្ធី អគ្គលេខាធិការរងគណៈកម្មាធិការវិនិយោគកម្ពុជា និងគណៈកម្មាធិការតំបន់សេដ្ឋ​កិច្ច​ពិសេសកម្ពុជាបានថ្លែងសុន្ទរថាបើក  ឯកឧត្តម ហេង សុខណាង  អគ្គលេខាធិការរងគណៈកម្មាធិការ​វិនិយោគកម្ពុជា និង​វាគ្មិនជាច្រើនរូបទៀតបានធ្វើបទបង្ហាញលើប្រធានបទគន្លឹះនានាពាក់​ព័ន្ធនឹងកិច្ច​ការវិនិយោគរួមមាន៖  (១) គោលនយោបាយលើកទឹកចិត្តវិនិយោគផ្នែកពន្ធដារ, (២) ការ​ជំរុញវិនិយោគ : បរិយាកាសវិនិយោគ និងកាលានុវត្តភាព, (៣) ក្របខ័ណ្ឌនីតិប្បញ្ញត្តិ និងច្បាប់វិនិយោគអន្តរជាតិ, (៤) ទស្សនទាននៃការ​ថែទាំវិនិយោគ ដែលបានចង្អុលបង្ហាញក្រោម “គោលនយោបាយអភិវឌ្ឍន៍វិស័យឧស្សាហកម្មនៅកម្ពុជា ឆ្នាំ២០១៥-២០២៥”, (៥) ការ​វាយតម្លៃ និងផ្ដល់ការលើកទឹកចិត្ត​វិនិយោគ, (៦) យន្តការត្រួតពិនិត្យ និងតាមដានគម្រោងវិនិយោគ, (៧) ការប្រតិបត្តិរបស់តំបន់សេដ្ឋ​កិច្ច​ពិសេសនៅកម្ពុជា, (៨) ទស្សនៈអនាគតសម្រាប់ការអនុវត្តគោលនយោបាយ​អភិវឌ្ឍន៍ឧស្សាហកម្ម និងការរៀបចំយុទ្ធសាស្ត្រជំរុញការវិនិយោគ, (៩) ការផ្តល់កិច្ចសម្រួលវិនិយោគរបស់ក្រុមប្រឹក្សាអភិវឌ្ឍន៍កម្ពុជា,​ និង (១០) សហប្រតិបត្តិការរវាងចិន និងកម្ពុជា ក្នុងការជំរុញវិនិយោគ និងកសាងសមត្ថភាព ព្រមទាំងតួនាទីរបស់ស្ថានទូតចិននៅកម្ពុជា​ក្នុងការជំរុញវិនិយោគចិន នៅកម្ពុជា។​​

នៅចុងបញ្ចប់នៃសិក្ខាសាលា  ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជា​អគ្គ-លេខាធិការក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ពីសារសំខាន់នៃកិច្ចសហប្រតិបត្តិការស្អិតរមួតរវាង​កម្ពុជា ចិន ដែលបានទាក់ទាញលំហូរទុនវិនិយោគដ៏ច្រើន និងបានបង្កើតការងារជូនប្រជាជាជនកម្ពុជា ជាពិសេស​តាមរយៈគោលនយោបាយផ្លូវមួយ ខ្សែក្រវ៉ាត់មួយដែលដាក់ចេញដោយរដ្ឋាភិបាលនៃសាធារណរដ្ឋប្រជាមានិត​ចិន ដែលបានបង្កើតយន្តការហិរញ្ញប្បទានសម្រាប់កម្ពុជាប្រើប្រាស់ដើម្បីបង្កើនកិច្ចអភិវឌ្ឍន៍សេដ្ឋកិច្ច សង្គម​របស់កម្ពុជា។ លើសពីនេះ ឯកឧត្តមរដ្ឋមន្ត្រី បានលើកឡើងពីគោលការណ៍សំខាន់ៗនៃ​គោលនយោបាយអភិវឌ្ឍន៍វិស័យឧស្សាហកម្មកម្ពុជា ឆ្នាំ២០១៥-២០២៥ ដែលទាមទារឱ្យមានកិច្ចសម្របសម្រួល និងសហការជិតស្និទ្ធរវាងក្រសួង​ ស្ថាប័ន និងរដ្ឋបាលថ្នាក់ក្រោមជាតិពាក់ព័ន្ធ សំដៅសម្រេចតាមគោលដៅ និងចក្ខុវិស័យរបស់គោល​នយោបាយក្នុងការអភិវឌ្ឍវិស័យឧស្សាហកម្មកម្ពុជា ឈានទៅធ្វើពិពិធកម្មមូលដ្ឋានឧស្សាហកម្ម​ និងទាក់ទាញការវិនិយោគសក្ដានុពលបន្ថែមទៀត សម្រាប់បង្កើតការងារកាន់តែច្រើនថែមទៀតជូនប្រជាជន​កម្ពុជា។ ជាចុងក្រោយ ឯកឧត្តមរដ្ឋមន្ត្រី បានផ្តាំផ្ញើដល់សិក្ខាកាមទាំងអស់ឱ្យយកបទពិសោធន៍ និងចំណេះដឹងទាំងនេះយកទៅអនុវត្ត និងផ្តល់នូវ​សេវាថែទាំវិនិយោគឱ្យកាន់តែ​ល្អប្រសើរ ក៏ដូច​ជាខិតខំប្រឹងប្រែងដើម្បីធ្វើការ​ទាក់ទាញអ្នកវិនិយោគឱ្យមកវិនិយោគនៅក្នុងខេត្តរបស់ខ្លួនកាន់តែច្រើន​ទ្បើងបន្ថែមទៀត  ព្រមទាំងបានប្រគល់នូវ​វិញ្ញាបនបត្រជូនសិក្ខាកាមទាំងអស់។